Azərbaycan Respublikasının Prezidenti İlham Əliyev AFR-in Federal Kəşfiyyat Xidmətinin rəhbəri Auqust Hanninqin başçılıq etdiyi nümayəndə heyətini qəbul etmişdir

Azərbaycan Respublikasının Prezidenti İlham Əliyev avqustun 12-də Prezident sarayında Almaniya Federativ Respublikası Federal Kəşfiyyat Xidmətinin rəhbəri Auqust Hanninqin başçılıq etdiyi nümayəndə heyətini qəbul etmişdir.
Dövlətimizin başçısı nümayəndə heyətinin Azərbaycana səfərindən məmnunluq duyduğunu bildirərək dedi ki, bu səfər ölkələrimiz arasında əlaqələrin müxtəlif sahələri ilə bağlı fikir mübadiləsi aparmaq üçün yaxşı imkan yaradır.
Azərbaycan ilə Almaniya arasında siyasi, iqtisadi və digər sahələrdə əməkdaşlığın uğurla inkişaf etdiyini vurğulayan Prezident İlham Əliyev ötən il AFR-ə səfərinin uğurla keçdiyini nəzərə çarpdırdı.
Avqustun 12-də Sumqayıtda "Siemens" şirkətinin Almaniya bankının krediti əsasında inşa edəcəyi elektrik stansiyasının təməlqoyma mərasimində iştirak etdiyini məmnunluqla vurğulayan dövlətimizin başçısı bunu iqtisadi əlaqələrin yaxşı nümunəsi kimi dəyərləndirdi.
Ölkələrimiz arasında siyasi sahədə də əməkdaşlığın inkişafından razılıq ifadə edən Prezident İlham Əliyev Azərbaycanın və Almaniyanın xüsusi xidmət orqanları arasında da qarşılıqlı informasiya mübadiləsi ilə bağlı yaxşı əlaqələrin mövcud olduğunu bildirdi.
Dövlətimizin başçısı dedi ki, hazırkı dövrdə dünyada, regionda sülh və sabitlik üçün böyük təhlükələrin mövcud olduğu bir vaxtda ölkələrimizin xüsusi xidmət orqanları arasında əməkdaşlığın regional təhlükəsizlik üçün böyük əhəmiyyəti vardır.
Prezident İlham Əliyev əmin olduğunu bildirdi ki, cənab Auqust Hanninqin Bakıya bu səfəri ölkələrimizin xüsusi xidmət orqanları arasında əlaqələrin inkişafına öz töhfəsini verəcək, Azərbaycan ilə Almaniya arasında münasibətlər bundan sonra da inkişaf edəcəkdir.
Rəhbərlik etdiyi nümayəndə heyətinə Azərbaycanda göstərilən səmimi qonaqpərvərliyə görə minnətdarlıq edən cənab Hanninq Bakıya ikinci dəfə səfərə gəldiyini söylədi. İndiki səfəri zamanı Azərbaycanın tarixi yerləri ilə tanış olmaq imkanı yarandığını bildirən qonaq dedi ki, gördüyü yerlər, əldə etdiyi məlumatlar onda Azərbaycan haqqında yüksək təəssürat yaratmışdır.
AFR-in federal kanslerinin salamlarını Prezident İlham Əliyevə çatdıran cənab Auqust Hanninq dedi ki, cənab Gerhard Şröder sizin Almaniyaya səfərinizin uğurla keçdiyini bildirdi. O, dövlətimizin başçısının AFR-ə səfərinin ölkələrimiz arasında əlaqələrin inkişafına böyük töhfə verdiyini vurğuladı. Avqustun 12-də Azərbaycanda demək olar ki, Almaniya gününün keçirildiyini nəzərə çarpdıran qonaq onun səfərinin belə bir vaxta təsadüf etməsindən məmnun qaldığını söylədi.
Regionda sülhün, sabitliyin qorunmasının vacibliyini vurğulayan cənab Auqust Hanninq ölkələrimizin xüsusi xidmət orqanları arasında çox yaxşı əməkdaşlığın mövcud olduğunu bildirərək dedi ki, Almaniyanın regionda ən çox etimad əsasında əməkdaşlıq etdiyi ölkə Azərbaycandır. O, Almaniya xüsusi xidmət orqanlarının zəngin təcrübəsini Azərbaycanın xüsusi xidmət orqanları ilə bölüşdürməyə hazır olduqlarını söylədi. Cənab Auqust Hanninq Azərbaycanın bu sahədə çox dəyərli bir tərəfdaş olduğunu vurğuladı.
Azərbaycan Prezidenti İlham Əliyev onun salamlarını AFR-in federal kansleri Gerhard Şröderə çatdırmağı xahiş etdi.

Ümummilli lider Heydər Əliyevin məzarını ziyarət

Avqustun 12-də Azərbaycanda səfərdə olan Almaniya Federativ Respublikası Federal Kəşfiyyat Xidmətinin rəhbəri Auqust Hanninqin başçılıq etdiyi nümayəndə heyəti Fəxri xiyabana gəlmişdir.
Burada qonaqları Azərbaycanın Milli Təhlükəsizlik Naziri general-leytenant Eldar Mahmudov qarşıladı.
Nümayəndə heyətinin üzvləri ümummilli lider, müstəqil Azərbaycanın memarı və qurucusu Heydər Əliyevin xatirəsini ehtiramla yad edərək məzarı önünə əklil qoydular.
Qonaqlar görkəmli oftalmoloq alim, akademik Zərifə xanım Əliyevanın məzarı üzərinə də gül-çiçək düzdülər.