Ümumi məlumat
Müstəqil Azərbaycan Respublikasının mühüm dövlətçilik təsisatlarından biri olan milli təhlükəsizlik orqanlarının formalaşması və inkişafında mühüm rol oynayan xüsusi xidmət orqanları və sərhəd xidməti üçün xalqına və dövlətinə ləyaqətlə xidmət edən, onun təhlükəsizliyi keşiyində dayanan, sədaqətli və vətənpərvər, yeni nəsil peşəkar və ixtisaslı kadrların hazırlanmasını həyata keçirən Milli Təhlükəsizlik Nazirliyinin Heydər Əliyev adına Akademiyasının yaradılması bilavasitə ümummilli lider Heydər Əliyevin adı ilə bağlıdır.
Zəngin və mənalı həyat yolunun 25 ilini milli təhlükəsizlik orqanlarında xidmətə həsr etmiş ulu öndərimiz 1997-ci il martın 28-də milli təhlükəsizlik orqanları əməkdaşlarının peşə bayramı gününün təsis edilməsinə həsr olunmuş yığıncaqda çıxış edərkən bu orqanlarda xidmət edən kadrların rolundan, qarşısına qoyulan tələblərdən və onları səciyyələndirən amillərdən danışaraq yüksək ixtisaslı, peşəkar kadrların hazırlanması məqsədilə Milli Təhlükəsizlik Nazirliyinin Akademiyasının yaradılmasının zəruri olduğunu qeyd etmişdi.
Xüsusi xidmət orqanları üçün peşəkar kadrların hazırlanması milli təhlükəsizliyin təmin edilməsində ən başlıca məsələlərdən biridir, çünki bundan yalnız milli təhlükəsizlik orqanlarının fəaliyyətinin effektivliyi deyil, həmçinin bütün ölkənin və xalqın təhlükəsizliyi asılıdır.
Bunun məntiqi nəticəsi kimi, Milli Təhlükəsizlik Nazirliyinin Akademiyası 1998-ci il dekabrın 1-də Azərbaycan Respublikasının Prezidenti Heydər Əliyevin sərəncamı ilə yaradılmışdır.
Ümummilli liderin digər sərəncamı ilə uzun illər respublikamızın xüsusi xidmət orqanlarında çalışmış və bu orqanlara rəhbərlik etmiş, böyük həyat və əməliyyat təcrübəsinə malik olan general-leytenant Ziya Məmmədiyyə oğlu Yusif-zadə 1999-cu il iyunun 28-də Akademiyaya rəis təyin edilmişdir.
Azərbaycan Respublikasının milli təhlükəsizlik orqanları və Sərhəd Qoşunları üçün kadr hazırlığı sahəsində nailiyyətləri nəzərə alınaraq, Azərbaycan Respublikasının Prezidenti İlham Əliyevin Fərmanı ilə 20 dekabr 2005-ci ildə Akademiyaya Heydər Əliyevin adı verilmişdir.
Milli təhlükəsizlik naziri general-leytenant Eldar Mahmudovun bilavasitə rəhbərliyi və nəzarəti altında Akademiyanın maddi-texniki və tədris bazası beynəlxalq standartlar səviyyəsində qurulmuşdur. Hazırda Akademiyanın ərazisi 10 hektardan çox sahəni əhatə edir. Akademiyanın maddi-texniki bazasına müasir tələblərə cavab verən avadanlıqlarla təchiz edilmiş tədris, inzibati və yataqxana korpusları, idman zalı və şəhərciyi, klub və mədəni-məişət kompleksi, tibb xidməti, kursant və zabit yeməkxanaları və digər infrastrukturlar daxildir. Akademiyanın Təlim mərkəzinin (poliqonunun) yaradılması məqsədilə tikinti işlərinə başlanmışdır.
Akademiya ərazisində milli təhlükəsizlik naziri general-leytenant Eldar Mahmudovun təşəbbüsü və bilavasitə rəhbərliyi ilə tikilmiş Azərbaycan xalqının ümummilli lideri Heydər Əliyevin həyat və fəaliyyətinin bütün dövrlərini, mənalı ömür yolunu əks etdirən, respublikamızda analoqu olmayan “Şöhrət” muzeyi yüksək memarlıq və bədii-estetik səviyyədə qurulmuşdur. Muzey qarşısında ulu öndərin möhtəşəm abidəsi ucaldılmışdır.
Muzeydə əksini tapmış eksponatlarda və stendlərdə dahi şəxsiyyətin xalqımızın tarixində və taleyində oynadığı misilsiz rolu özündə ehtiva edən və indiyədək heç bir məkanda nümayiş etdirilməyən fotostendlər, unikal sənədlər, həyatının 25 ilini həsr etdiyi milli təhlükəsizlik orqanlarındakı iş dövrünü əks etdirən arxiv materialları, onun şəxsən həyata keçirdiyi yüksək səviyyəli əməliyyatlar haqqında məlumatlar vardır. Muzeydə Heydər Əliyevin heykəltaraş Fuad Salayev tərəfindən yüksək zövqlə yaradılmış “Ali Baş Komandan” büstü muzeyə gələnlərdə gözəl təəssurat yaradır.
“Şöhrət” muzeyində dahi şəxsiyyətin zəngin ömür yolunu əks etdirən dəyərli ekspozisiyalar şərti olaraq dörd mərhələyə bölünmüşdür: uşaqlıq və gənclik dövrü; Azərbaycan təhlükəsizlik orqanlarında işlədiyi dövr; ölkəyə rəhbərlik etdiyi və SSRİ kimi nəhəng bir dövlətin siyasi olimpində təmsil olunduğu dövr; müstəqil Azərbaycanın memarı kimi fəaliyyət dövrü.
Azərbaycan Respublikasının Prezidenti, Ali Baş Komandan İlham Əliyev 2006-cı ilin mart ayının 27-də Akademiyada olmuş, ulu öndərin abidəsini və “Şöhrət” muzeyini açmış, Akademiyaya Döyüş Bayrağı təqdim etmişdir. Ali Baş Komandan tədbirdə proqram xarakterli geniş nitq söyləyərək, Akademiyada görülən işləri yüksək qiymətləndirmiş, dəyərli tövsiyələr vermiş, MTN-in, o cümlədən Akademiyanın şəxsi heyəti qarşısında mühüm vəzifələr qoymuşdur.
Xüsusi statusa malik olan Akademiyanın rəhbərliyi və professor-müəllim heyəti ulu öndərimiz Heydər Əliyevin, onun siyasi varisi, Azərbaycan Respublikasının Prezidenti, Ali Baş Komandan, xalqımızın sevimli oğlu İlham Əliyevin və milli təhlükəsizlik naziri general-leytenant Eldar Mahmudovun Akademiya qarşısında qoyduqları mühüm dövlət əhəmiyyətli vəzifələri dərindən dərk edir, kursantların vətənpərvərlik, xalqa və Vətənimizə sədaqət ruhunda tərbiyə edilməsində rəhbər tuturlar.
2009-cu ilin dekabr ayının 5-də Milli Təhlükəsizlik Nazirliyinin Heydər Əliyev adına Akademiyasının yaradıl-masının 10 illik yubileyitəntənəli surətdə qeyd edilmişdir. Yubiley tədbirində Prezident Administrasiyasının hüquq mühafizə orqanları ilə iş şöbəsinin müdiri, təhsil naziri, Milli Məclisin deputatları və respublikanın ali təhsil ocaqlarının rektorları, hərbi tədris müəssisələrinin rəisləri, ictimai-siyasi xadimlər və görkəmli ziyalılar iştirak etmişlər.
Mərasimin rəsmi hissəsində Azərbaycan Respublikası Prezident Administrasiyasının şöbə müdiri Fuad Ələsgərov Akademiyanın yaradılmasının 10 illik yubileyi münasibətilə Azərbaycan Prezidenti, Silahlı Qüvvələrin Ali Baş Komandanı İlham Əliyevin təbrik məktubunu oxumuş, milli təhlükəsizlik naziri general-leytenant Eldar Mahmudov, Akademiyanın rəisi general-leytenant Ziya Yusif-zadə, təhsil naziri Misir Mərdanov, Yeni Azərbaycan Partiyasının sədr müavini və icra katibi, deputat Əli Əhmədov, Azərbaycan Respublikasının Prezidenti yanında Dövlət İdarəçilik Akademiyasının rektoru, professor Seyfəddin Qəndilov çıxış etmişlər. Tədbirdə Akademiyanın şəxsi heyəti adından Prezident İlham Əliyevə müraciət qəbul olunmuşdur.
Milli təhlükəsizlik naziri general-leytenant Eldar Mahmudovun bilavasitə rəhbərliyi və nəzarəti altında Akademiyanın gələcək perspektiv inkişafı istiqamətində müəyyən tədbirlər həyata keçirilir. Bu tədbirlər çərçivəsində Akademiya ərazisində təməli onun tərəfindən qoyulmuş qapalı idman kompleksi tikilmişdir.
Eyni zamanda, “Azərbaycan Respublikasının NATO ilə Fərdi Tərəfdaşlıq üzrə Əməliyyat Planı” çərçivəsində Akademiyanın nəzdində dünya standartlarına cavab verən Beynəlxalq Antiterror Təlim Mərkəzinin yaradılması istiqamətində işlər görülür. Hazırda Akademiya yaxınlığında ayrılmış əlavə ərazidə bu kompleksin tikintisinə başlanması planlaşdırılır.
Akademiya respublikanın əlaqədar nazirlikləri, komitələri, ali təhsil müəssisələri, habelə bir sıra xarici ölkələr və beynəlxalq təşkilatlarla işgüzar əlaqələrə əsaslanan qarşılıqlı faydalı əməkdaşlıq qurulmuşdur.Belə ki, ötən dövr ərzində ABŞ, Kanada, Rusiya, Böyük Britaniya, Almaniya, Yaponiya, Türkiyə, Ukrayna, Polşa, Hollandiya, Avstriya, Rumıniya, Litva, Qazaxıstan, Səudiyyə Ərəbistanı, Misir, İordaniya, Cənubi Koreya, Pakistan və digər ölkələri, NATO, ATƏT, Beynəlxalq Miqrasiya Təşkilatı kimi beynəlxalq təşkilatları təmsil edən rəsmi şəxslər, təhlükəsizlik və mirqasiya məsələləri üzrə ekspertlər, eləcə də bir sıra ölkələrin Azərbaycandakı səfirliklərinin nümayəndələri Akademiyaya səfər etmiş, Akademiyanın maddi-texniki bazası və “Şöhrət” muzeyi ilə tanış olmuş, müxtəlif kurslarda və tədbirlərdə iştirak etmiş, təcrübə mübadiləsi aparmışlar.