Azərbaycanın milli mənafelərinin qorunmasında milli təhlükəsizlik orqanları böyük rola malikdir

Bu fikir martın 30-da Azərbaycan Respublikası milli təhlükəsizlik orqanlarının yaradılmasının 89-cu ildönümü ilə əlaqədar keçirilən tədbirdə səslənmişdir.

Milli Təhlükəsizlik Nazirliyinin əməkdaşları əvvəlcə Fəxri xiyabana gələrək, Azərbaycanın təhlükəsizlik orqanlarında milliləşmə prosesinin banisi, müstəqillik illərində MTN-in ölkəmizin milli və dövlət maraqlarını qoruyan, yüksək peşəkarlığa malik qurum kimi formalaşmasında misilsiz xidmətləri olmuş ümummilli liderimiz Heydər Əliyevin xatirəsini ehtiramla yad etmiş, məzarı önünə əklil qoymuşlar.

Görkəmli oftalmoloq alim, akademik Zərifə xanım Əliyevanın da xatirəsi ehtiramla anılmış, məzarı üzərinə gül dəstəsi qoyulmuşdur.

Sonra Şəhidlər xiyabanına gələn nazirliyin əməkdaşları Vətənimizin müstəqilliyi və ərazi bütövlüyü uğrunda mübarizədə canlarından keçmiş oğul və qızlarımızın unudulmaz xatirəsini yad etmiş, məzarları üstünə güllər düzmüş, "Əbədi məşəl" abidəsinin önünə əklil qoymuşlar.

Azərbaycanın suverenliyi və ərazi bütövlüyü uğrunda mübarizədə həlak olmuş və burada dəfn edilmiş MTN əməkdaşlarının - Azərbaycanın Milli qəhrəmanları Eldar Məmmədovun, Nadir Əliyevin və gizir Zərbəli Nəzirovun da xatirəsi yad edilmiş, məzarları üzərinə güllər düzülmüşdür. Əməkdaşlar silah yoldaşlarının - erməni işğalçıları ilə döyüşlərdə rəşadət göstərərək şəhid olmuş və Azərbaycanın Milli Qəhrəmanı adına layiq görülmüş Riyad Əhmədovun, Nadir Əliyevin, Əmiraslan Əliyevin, Eldar Məmmədovun, Faiq Cəfərovun, Bəhruz Mansurovun xatirəsinə MTN binasında asılmış lövhənin önünə də gül qoymuş, onların xatirəsinə ehtiramlarını bildirmişlər.

Milli təhlükəsizlik orqanları əməkdaşlarının peşə bayramına həsr olunmuş təntənəli yığıncaq Azərbaycanın dövlət himninin səsləndirilməsi ilə başlanmışdır.

Milli təhlükəsizlik naziri general-leytenant Eldar Mahmudov yığıncaqda çıxış edərək demişdir ki, bütün respublikamız üçün uğurlu olmuş 2007-ci il bu gün peşə bayramlarını qeyd edən nazirliyin əməkdaşları üçün də mühüm hadisələrlə, müvəffəqiyyətlə nəticələnən əməliyyatlarla yadda qalmışdır. Məhz bu nailiyyətlərin nəticəsidir ki, peşə bayramı ərəfəsində Azərbaycan Prezidenti İlham Əliyevin Sərəncamı ilə nazirliyin əməkdaşlarından 3 nəfər general-mayor rütbəsi almış və bir qrup əməkdaş yüksək dövlət mükafatlarına layiq görülmüşdür.

Son 4 ildə aparılmış islahatlar, qazanılmış uğurlar davam etdirilmişdir. Nazirliyin qanunvericilik, normativ-hüquqi və maddi-texniki bazası təkmilləşdirilmiş, əməkdaşların sosial müdafiəsinin gücləndirilməsi istiqamətində xeyli iş görülmüş, beynəlxalq əməkdaşlığın genişləndirilməsinə xüsusi diqqət yetirilmişdir. İndi nazirlik 50-yə yaxın beynəlxalq struktur və xarici dövlətlərin müvafiq xüsusi xidmət orqanları ilə əməkdaşlıq əlaqələri saxlayır.

Dövlətimizin başçısı İlham Əliyevin Ermənistanın təcavüzkar və riyakar siyasətinə qarşı informasiya mübarizəsi, Azərbaycan həqiqətlərinin beynəlxalq ictimaiyyətə çatdırılması sahəsində hücum taktikası ilə bağlı tövsiyələri rəhbər tutularaq, məqsədyönlü kompleks tədbirlər həyata keçirilir.

Nazir bu yöndə Əsir və itkin düşmüş, girov götürülmüş vətəndaşlarla əlaqədar Dövlət Komissiyasının da səylərini qeyd etmişdir. Son dövrdə komissiyanın fəaliyyətində əsaslı dəyişikliklər baş vermiş, keyfiyyətcə yeni mərhələ başlanmışdır. Bu yeniliklər itkinlərin axtarışı sahəsində özünü qabarıq göstərmişdir. Dövlət Komissiyası Ermənistanın Azərbaycana qarşı hərbi təcavüzü zamanı törədilmiş cinayət faktları ilə beynəlxalq ictimaiyyətin məlumatlandırılması üçün xarici ölkələrdə keçirilmiş bir çox tədbirdə təmsil olunmuşdur. Beynəlxalq Qızıl Xaç Komitəsi və Avropa Şurasının müvafiq strukturları və digər beynəlxalq təşkilatlarla işgüzar münasibətlər qurulmuşdur. Xarici ölkələrdə fəaliyyət göstərən səfirliklərimiz, diaspor təşkilatları, ayrı-ayrı tədqiqatçılar üçün xüsusi çap məhsulları və elektron materiallar hazırlanaraq onlara göndərilmişdir.

Milli təhlükəsizlik naziri kəşfiyyat, əks-kəşfiyyat, hərbi əks-kəşfiyyat və antiterror fəaliyyəti sahələrində əldə olunmuş uğurları xüsusi vurğulamış, dünyada və regionda gedən proseslərə, əməliyyat şəraitinə, dövrün çağırışlarına və təhdidlərinə uyğun yeni vəzifələrin müəyyənləşdirildiyini qeyd etmişdir.

Naxçıvan Milli Təhlükəsizlik Nazirliyinin və digər yerli strukturların fəaliyyəti də təqdirəlayiq hesab olunmuşdur. Göstərilmişdir ki, Azərbaycanın təhlükəsizlik orqanlarının əldə etdiyi uğurlarda bu qurumların öz payı vardır. Naxçıvan Milli Təhlükəsizlik Nazirliyi kəşfiyyat-pozuculuq, narkotiklərin qaçaqmalçılığı ilə bağlı cinayətkar fəaliyyətin, eləcə də beynəlxalq terrorçu təşkilatların bu ərazidən istifadə etmək niyyətlərinin qarşısının alınması istiqamətində zəruri işlər görmüşdür. Hazırda nazirliyin kadr potensialı və texniki təminatı daha da gücləndirilmiş, bütün lazımi şərait yaradılmışdır. Eyni zamanda MTN-in yerli strukturlarının binalarının da müasir standartlara uyğun inşası və təminatı davam etdirilir.

Ümumən nazirlik sistemində əməkdaşların bilik, təcrübə və peşəkarlıq səviyyəsinin artırılması məsələsi diqqət mərkəzində saxlanılmışdır.

Nazir qeyd etmişdir ki, MTN-in cəmiyyətdə nüfuzunun artması ilə əlaqədar son vaxtlar işə qəbul üçün daha çox gənc müraciət edir. Onların arasında yüksək savada, geniş dünyagörüşünə, müasir informasiya texnologiyaları sahəsində biliklərə malik olanlar və xarici dilləri bilənlərə üstünlük verilir.

General-leytenant Eldar Mahmudov xüsusi vurğulamışdır ki, bütün bu işlər Prezident İlham Əliyevin Milli Təhlükəsizlik Nazirliyinə xüsusi diqqət və qayğısı sayəsində mümkün olmuşdur. Dövlət başçısının etimadı əməkdaşları daha yaxşı işləməyə, qarşıda duran vəzifələri layiqincə yerinə yetirməyə səfərbər etmişdir.

Ötən il xarici ölkələrin, xüsusən də Ermənistanın xüsusi xidmət orqanlarının ölkəmizə qarşı apardıqları kəşfiyyat-təxribat fəaliyyətinin, plan və niyyətlərinin, onların maraq obyektlərinin müəyyənləşdirilməsi üzrə mühüm işlər görülmüşdür.

Transmilli mütəşəkkil cinayətkarlığın müxtəlif növlərinə, o cümlədən narkotiklərin qanunsuz dövriyyəsinə, qaçaqmalçılığa, qanunsuz miqrasiyaya qarşı mübarizə sahəsində tədbirlər uğurla davam etdirilmişdir. Ən aktual problemlərdən olan beynəlxalq terrorçuluğa, separatçılığa, dini ekstremist fəaliyyətə qarşı mübarizə sahəsində önəmli nəticələr əldə edilmişdir.

Azərbaycan Respublikasının antiterror koalisiyasının ən fəal üzvlərindən biri kimi tanınmasında mühüm rolu olan nazirlik ötən ildə də önəmli nailiyyətlər əldə etmişdir. Keçirilmiş tədbirlər nəticəsində "Əl-Qaida" və "Əl-Cihad" kimi beynəlxalq terrorçu qurumlarla əlaqələrə malik, həmçinin əməllərində dövlətə xəyanət, hakimiyyəti zorla ələ keçirmə, ümumən dövlətin əsaslarının sarsıdılmasına yönələn cinayətlərin tərkibi olan 3 radikal-ekstremist, təhlükəli silahlı dəstə zərərsizləşdirilmişdir. Onların tərkibinə daxil olan 40 nəfər həbs olunmuşdur. Bunların arasında silahlı basqınlar törətmiş, özlərini "Meşə qardaşları" adlandıran silahlı qruplaşmanın 16 üzvü də olmuşdur. Həmçinin Qərb ölkələrinin səfirliklərinə qarşı terror aksiyalarının keçirilməsini planlaşdıran dini ekstremist qrupun 9 nəfər üzvü həbs edilərək cinayət məsuliyyətinə cəlb olunmuşdur. Ötən il ölkəmizə qarşı kəşfiyyat-pozuculuq fəaliyyəti ilə məşğul olan 20 nəfər zərərsizləşdirilmişdir ki, onlardan 13-ü torpaqlarımızı işğal altında saxlayan Ermənistanın xeyrinə casusluqla məşğul olanlardır.

Cari ildə 3 böyük və əlamətdar tədbirin keçiriləcəyini xüsusi qeyd edən nazir, həm ümummilli lider Heydər Əliyevin anadan olmasının 85-ci ildönümünün, həm Azərbaycan Demokratik Respublikasının yaradılmasının 90 illiyinin, həm də ölkəmiz üçün mühüm ictimai-siyasi hadisə olan növbəti prezident seçkilərinin uğurla başa çatması üçün bütün müvafiq tədbirlərin görüləcəyini vurğulamışdır.

Çıxışının sonunda Eldar Mahmudov Prezident İlham Əliyevə milli təhlükəsizlik orqanlarına göstərdiyi gündəlik diqqət və qayğıya, peşə bayramı ərəfəsində əməkdaşların dövlət mükafatları və ali rütbələrlə təltif etməsinə görə dərin minnətdarlığını bildirmiş, Ali Baş Komandanın sadiq və yenilməz əsgərləri olan təhlükəsizlik orqanları əməkdaşlarının Azərbaycanın müstəqilliyinin və dövlətimizin etibarlı qorunması işində daim öndə olacaqlarını qeyd etmişdir.

Yığıncaqda Prezidentin İcra Aparatının Hüquq-Mühafizə orqanları ilə iş şöbəsinin müdiri Fuad Ələsgərov, MTN-in Heydər Əliyev adına Akademiyasının rəisi general-leytenant Ziya Yusifzadə, təhlükəsizlik orqanlarının veteranları Ənvər Məmmədyarov və Əhəd Şəmsizadə təbrik sözü söyləmişlər.

Bildirilmişdir ki, Prezidentin 2008-ci il 29 mart tarixli Sərəncamı ilə nazirliyin 12 əməkdaşı "Vətən uğrunda", 7 nəfəri "İgidliyə görə" və 11 nəfəri "Hərbi xidmətlərə görə" medalları ilə təltif edilmişdir.

Nazir bir qrup zabitə "Hərbi xidmətdə fərqlənməyə görə" medalını, "Fəxri əməkdaş" döş nişanını və veteranlara qiymətli hədiyyələr təqdim etmişdir.

Yığıncaqda Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevə müraciət qəbul olunmuşdur.

Tədbirin sonunda MTN-in fəaliyyəti ilə əlaqədar sənədli film nümayiş etdirilmişdir.