Azərbaycan, rus və ingilis dillərində oxucuların diqqətinə təqdim olunan kitab müəllifin əvvəllər dövri mətbuatda Azərbaycan Demokratik Respublikasının (1918-1920-ci illər) milli təhlükəsizlik orqanlarının yaranma tarixi ilə bağlı nəşr edilmiş araşdırmalarından ibarət ümumiləşdirilmiş və təkmilləşdirilmiş tədqiqat əsəridir. Milli Təhlükəsizlik Nazirliyinin məsul əməkdaşı, tarix elmləri namizədi olan müəllif ADR hökumətinin Hərbi Nazirliyin kəşfiyyat və əks-kəşfiyyat bölməsinin, habelə Əksinqilabla Mübarizə Təşkilatının yaranması və təşəkkülü sahəsində fəaliyyətini əks etdirən məxfilik qrifi götürülmüş arxiv materialları və sənədlərini ilk dəfə elmi dövriyyəyə gətirmişdir. Bu tədqiqatların gedişində Azərbaycan təhlükəsizlik orqanlarının yaranmasının gerçək tarixi olan 28 mart 1919-cu il aşkarlanmış və Azərbaycan xüsusi xidmət orqanlarının tarixi köklərinin sovet dövründə hesab olunduğu kimi heç də Azərbaycanda sovet hakimiyyətinin bərqərar olduğu illərdən deyil, daha erkən dövrlərdən qaynaqlandığı elmi cəhətdən sübuta yetirilmişdir. Azərbaycan Respublikası Prezidentinin sərəncamı ilə bu tarix milli təhlükəsizlik orqanları əməkdaşlarının peşə bayramı kimi təsis edilmişdir. Kitab dünya xüsusi xidmət orqanları və Azərbaycan tarixi ilə maraqlanan geniş oxucu kütləsi üçün nəzərdə tutulmuşdur. Azərbaycan, rus və ingilis dilində olan kitab 2004-cü ildə nəşr edilmişdir.

kitabın elektron variantını yüklə