Ümummilli Lider Heydər Əliyevin məzarını ziyarət

Azərbaycanda səfərdə olan Almaniya Bundestaqının nümayəndə heyəti mayın 24-də səhər Fəxri xiyabana gəlmişdir. Burada qonaqları Azərbaycanın milli təhlükəsizlik naziri general-leytenant Eldar Mahmudov qarşıladı. Nümayəndə heyətinin üzvləri ümummilli lider, müstəqil Azərbaycanın memarı və qurucusu Heydər Əliyevin xatirəsini ehtiramla yad edərək məzarı önünə əklil qoydular.

Qonaqlar görkəmli oftalmoloq alim, akademik Zərifə xanım Əliyevanın məzarı üzərinə də gül-çiçək düzdülər.

Şəhidlərin xatirəsinə ehtiram

Almaniya Bundestaqının nümayəndə heyəti Şəhidlər xiyabanını da ziyarət etmişdir. Qonaqlar Azərbaycanın müstəqilliyi və ərazi bütövlüyü uğrunda canlarından keçmiş qəhrəmanların xatirəsini ehtiramla yad etdilər, “Əbədi məşəl” abidəsinin önünə əklil qoydular. Azərbaycanın milli təhlükəsizlik naziri general-leytenant Eldar Mahmudov Şəhidlər xiyabanının tarixi barədə qonaqlara ətraflı məlumat verdi.

Nümayəndə heyətinin üzvləri buradan Bakının mənzərəsini seyr etdilər və xatirə şəkli çəkdirdilər.

Milli Təhlükəsizlik Nazirliyində Almaniya Bundestaqinin nümayəndə heyəti ilə görüş olmuşdur

Azərbaycan Respublikasının milli təhlükəsizlik naziri, general-leytenant Eldar Mahmudov mayın 24-də Almaniya Bundestaqı büdcə məsələləri komissiyasının sədri Manfred Karstens, etimad məsələləri komissiyasının sədri Valter Şöller, Federal Kəşfiyyat Xidmətinin vitse-prezidenti, briqada generalı Verner Şöve və digər rəsmi şəxslərin daxil olduqları nümayəndə heyəti ilə görüşmüşdür. Görüşdə nazir Eldar Mahmudov Azərbaycanın siyasi rəhbərliyi tərəfindən hüquqi və demokratik dövlət quruculuğu sahəsində aparılan islahatlar, sosial-iqtisadi inkişaf, habelə mühüm beynəlxalq layihələrin həyata keçirilməsi üçün başlıca şərt olan sabitliyin möhkəmləndirilməsi istiqamətində görülən işlər barədə məlumat vermişdir. Qonaqlara ölkəmizdə təhlükəsizliyin təmin olunması, cinayətkarlıqla, onun təhlükəli formaları və təzahürləri ilə mübarizədə Milli Təhlükəsizlik Nazirliyinin yeri və rolu haqqında, eləcə də bu orqanda beynəlxalq norma və standartlara uyğun qanunvericilik bazasının möhkəmləndirilməsi və aparılan islahatlar barədə ətraflı məlumat verdi. Daha sonra, nazir beynəlxalq terrorçu təşkilatlarla sıx əlaqəsi olan, mütəşəkkil transmilli cinayətkar qrupların zərərsizləşdirilməsi istiqamətində görülən işlərdən, regionda kriminogen şərait, ona təsir göstərən amillər, ictimai-siyasi və hərbi vəziyyət, Ermənistan-Azərbaycan, Dağlıq Qarabağ münaqişəsi, nəzarət olunmayan ərazilər və bunların doğurduğu fəsadlar, habelə qanunsuz miqrasiya, narkotrafik və s. məsələlərlə bağlı görülən adekvat tədbirlər haqqında söhbət açmışdır.
Ətraflı məlumata görə təşəkkür edən qonaqlar, bütün bunlar barədə Qərb ictimaiyyətinin kifayət qədər informasiyasının olmadığından təəssüfləndiklərini bildirdilər, bu yöndə obyektiv təbliğat işinin daha da gücləndirilməsinin vacibliyini vurğuladılar.

Almaniya ilə Azərbaycan arasında münasibətlərin inkişafından məmnun qaldıqlarını bildirən nümayəndə heyətinin üzvləri bu səfərin ölkələrimizin əlaqələrinin daha da möhkəmlənməsi baxımından faydalı olacağına, respublikamızın sosial-iqtisadi inkişaf sahəsində daha sanballı uğurlar qazanacağına əminliklərini söylədilər. Almaniya Federativ Respublikasının Azərbaycandakı səfiri Detlef Lingemanın da iştirak etdiyi görüşdə qarşılıqlı maraq doğuran bir sıra digər məsələlərə dair fikir mübadiləsi aparıldı.

24.05.05 “AzərTac”