|
Milli təhlükəsizlik orqanlarının yaradılmasının 86-cı ildönümü münasibətilə Suraxanı rayonunda Milli Qəhrəman Nadir Əliyevin adını daşıyan 282 nömrəli orta məktəbdə tədbir keçirilmişdir.
Suraxanı Rayon İcra Hakimiyyətinin başçısı Natiq Mehdiyevin, MTN-in yerli şöbəsinin rəisi Vahid Zeynalovun, Milli Təhlükəsizlik Nazirliyinin veteranlarının, rayon ictimaiyyəti nümayəndələrinin, məktəbin müəllim və şagird kollektivinin iştirak etdikləri tədbiri Milli Qəhrəmanın adını daşıyan təhsil ocağının direktoru Əzim Cəfərov açdı. O dedi ki, məktəbin kollektivi Milli Təhlükəsizlik Nazirliyinin əməkdaşı, Ağdam uğrunda gedən döyüşlərdə şəhid olmuş Nadir Əliyevin adını həmişə uca tutur, təhsildə əldə etdiyi uğurlarla ona layiq olmağa çalışır.
Məktəblilərin ifasında dövlət himni səsləndikdən sonra şagirdlər vətəni, dövləti, azadlığı tərənnüm edən şerlər və mahnılar ifa etdilər.
Görüşdə çıxış edən natiqlər milli təhlükəsizlik orqanlarının yarandığı gündən müasir dövrümüzə qədər keçdiyi çətin və şərəfli tarixə nəzər saldılar. Nadir Əliyevin silahdaşları Milli Qəhrəmanın qısa və şərəfli ömür yolundan söhbət açdılar. MTN-in veteranları istefada olan polkovniklər Arif Zeynalov və Əli Orucov çıxış edərək Milli Təhlükəsizlik Nazirliyinin son dövrlərdə həyata keçirdiyi əməliyyat tədbirlərinin, xüsusilə də «Qara Kəmər» əməliyyatının respublika ictimaiyyətində dərin razılıq hissini doğurduğunu vurğuladılar. Qeyd etdilər ki, bu Milli Təhlükəsizlik Nazirliyi hər bir Azərbaycan vətəndaşının təhlükəsizliyinin və müstəqil dövlətimizin keşiyində ayıq-sayıq dayanmışdır. Prezident İlham Əliyevin apardığı uğurlu kadr siyasəti öz bəhrəsini vermişdir.
MTN əməkdaşı Elşad Əliyev Milli Qəhrəman Nadir Əliyevlə bağlı xatirələrini danışdı.
Belə görüşlərini gənclərin vətənpərvərlik tərbiyəsində mühüm rol oynadığını vurğulayan Suraxanı Rayon İcra Hakimiyyətinin başçısı Natiq Mehdiyev MTN əməkdaşlarını peşə bayramları münasibətilə təbrik etdi, onlara işlərində uğurlar arzuladı.
Tədbirin sonunda MTN Suraxanı rayon şöbəsinin rəisi Vahid Zeynalov bir ədəd müasir kompüter dəstini və Nadir Əliyevin şərəfli döyüş yolunu əks etdirən fotostendi milli təhlükəsizlik naziri general-leytenant Eldar Mahmudovun adından məktəbə hədiyyə etdi. Milli Qəhrəman Nadir Əliyevin ailəsi və məktəbin rəhbərliyi göstərilən diqqət və qayğıya görə MTN rəhbərliyinə təşəkkürlərini bildirdilər.
"Azərbaycan", 27 mart 2005-ci il
|
