28 May - Respublika Günü münasibətilə Azərbaycan Dövlət Neft Akademiyasında Milli Təhlükəsizlik Nazirliyinin bir qrup əməkdaşı ilə görüş keçirilmişdir.

Tədbiri Azərbaycan Dövlət Neft Akademiyasının rektoru, akademik Siyavuş Qarayev açaraq məlumat vermişdir ki, Şərqdə ilk dəfə Azərbaycan Demokratik Respublikasının yaranmasından artıq 89 il keçir. Natiq tədbir iştirakçılarını bu əlamətdar gün münasibətilə təbrik etmiş, Milli Təhlükəsizlik Nazirliyinin əməkdaşlarına bayram ərəfəsində təhsil ocağının kollektivi ilə görüşə gəldiklərinə görə müəllim-professor və tələbə heyəti adından təşəkkürünü bildirmişdir.

Hazırda ölkəmizdə uğurla həyata keçirilən neft strategiyası sahəsində əldə edilən nailiyyətlərin asan başa gəlmədiyini, bunun yalnız Heydər Əliyev dühasının sayəsində mümkün olduğunu diqqətə çatdıran Siyavuş Qarayev bu gün Azərbaycanın inamla iqtisadi dirçəlişə yüksəlməsində Prezident İlham Əliyevin misilsiz xidmətlərindən söhbət açdı. O bildirdi ki, ölkəmizin sürətlə iqtisadi inkişafa nail olmasının əsas amillərindən biri də respublikada hökm sürən sabitlik və təhlükəsizlik mühitidir. Bunun əldə olunmasında isə ölkənin milli təhlükəsizlik orqanlarının rolu əvəzsizdir.

Daha sonra MTN-in idarə rəisləri Məmməd Cəfərli və İsmayıl Abdullayev tədbir iştirakçılarına təhlükəsizlik orqanları əməkdaşlarının fəaliyyətinin müxtəlif sahələri barədə məlumat verdilər. Natiqlər bu orqanın keçdiyi tarixi mərhələlər, müstəqilliyini bərpa etdikdən sonra Azərbaycanın formalaşması və möhkəmlənməsində görkəmli dövlət xadimi Heydər Əliyevin rolundan minnətdarlıqla söz açdılar.

Azərbaycan xüsusi xidmət orqanlarının transmilli mütəşəkkil cinayətkarlığın, o cümlədən beynəlxalq terrorçuluq şəbəkəsinin tərkib hissəsi olan erməni terror təşkilatlarının ölkəmizdə terror niyyətlərinin, planlaşdırılan kəşfiyyat-təxribat aksiyalarının, düşmənin respublikanın müxtəlif regionlarında separatçılığı qızışdırmaq cəhdlərinin qarşısının alınması barədə faktlar maraqla qarşılanmışdır. Xüsusi vurğulanmışdır ki, təhlükəsizlik orqanları müxtəlif vasitələrlə Azərbaycanı beynəlxalq terrorçuluq poliqonuna, narkobiznes üçün tranzit yoluna çevirmək istəyənlərə layiqli müqavimət göstərir, terror aktlarının qarşısını alır, daxildəki xəyanətkarları ifşa edir, mütəşəkkil cinayətkarlığın müxtəlif təzahürləri ilə mübarizə aparırlar.

Tədbir iştirakçılarına Milli Təhlükəsizlik Nazirliyinin iqtisadi təhlükəsizlik sahəsində gördüyü tədbirlər, nazirlikdə həyata keçirilən uğurlu yeniliklər, o cümlədən maddi-texniki bazanın möhkəmləndirilməsi haqqında da məlumat verilmişdir. Xüsusi vurğulanmışdır ki, milli təhlükəsizlik orqanlarının ictimaiyyətlə artıq ənənəyə çevrilmiş bu cür görüşlərinin keçirilməsi ölkəmizin xüsusi xidmət orqanlarına etimadın artmasının bariz nümunəsidir.

MTN əməkdaşları görüş iştirakçılarını maraqlandıran suallara cavab vermişlər. Sonra nazirliyin əməkdaşları təhsil ocağının kitabxanasına ermənilərin Azərbaycan xalqına qarşı yeritdiyi təcavüzkar və terrorçuluq siyasətini ifşa edən, eləcə də Dağlıq Qarabağın Azərbaycanın əzəli və əbədi torpağı olması barədə xarici tədqiqatçıların Milli Təhlükəsizlik Nazirliyinin dəstəyi ilə bir neçə dilə tərcümə olunmuş kitablarını təqdim etdilər.