Bakının Əzizbəyov rayonunun Mərdəkan qəsəbəsindəki mədəniyyət sarayında Azərbaycan təhlükəsizlik orqanlarının 86 illiyi münasibətilə Milli Təhlükəsizlik Nazirliyi əməkdaşlarının veteranlar, ziyalılar və gənclərlə görüşü keçirilmişdir.

Nazirliyin əməkdaşı Lətif Babayev şanlı ənənələri olan təhlükəsizlik xidməti orqanlarının yaradılması, inkişaf tarixi barədə çıxışında bildirmişdir ki, 1919-cu il martın 28-də Azərbaycan Demokratik Respublikası Hərbi Nazirliyinin Baş Qərargahı nəzdində kəşfiyyat və əks-kəşfiyyat bölməsinin yaradılması ilə təməli qoyulan təhlükəsizlik orqanları 1956-65-ci illərdə ümummilli liderimiz Heydər Əliyevin Dövlət Təhlükəsizliyi Komitəsində əvvəlcə əks-kəşfiyyata, sonra isə Komitəyə rəhbərliyi dövründə keyfiyyətcə yeni mərhələyə qədəm qoymuş, qısa müddətdə burada çalışan milli kadrların tərkibi 20 faizdən 60-80 faizədək yüksəlmiş, DTK-da kök salmış, xalqımızın milli varlığına, layiqli yetirmələrinə qənim kəsilmiş erməni millətçilərinin əsrin əvvəlindən başlanmış bədnam fəaliyyətinə son qoyulmuşdur.

Dahi rəhbərin xalqımızın təkidli tələb və çağırışları ilə ikinci dəfə respublikamızın siyasi rəhbərliyinə qayıdışı dövründə müstəqil dövlətçiliyimizin bərqərar olması, milli-demokratik dövlət quruculuğu uğrunda apardığı çətin, şərəfli, gərgin mübarizəsində də vaxtilə onun bu sistemdə yaratdığı məktəbin milli ruhlu yetirmələri böyük öndərin sədaqətli yardımçıları olmuşlar.

Qürur hissi ilə vurğulanmışdır ki, bu ənənə indi də davam edir. Uzun müddətdən bəri vətəndaşlarımızın haqlı narahatlığına səbəb olmuş qətllər, adam oğurluğu cinayətləri törətmiş bandanın üzvlərinin ümummilli liderimizin siyasi xəttinin layiqli davamçısı Prezident İlham Əliyevin qəti göstəriş və tapşırığı ilə məhz Milli Təhlükəsizlik Nazirliyinin xüsusi əməliyyat-axtarış və istintaq qrupu tərəfindən aşkar edilib tutulması cəmiyyətdə MTN-nin nüfuzunun, peşəkarlığının, Prezidentə, Ali baş komandana, Vətənə, dövlətə sədaqətinin əyani sübutuna çevrilmişdir.

Dövlətimizin ərazi bütövlüyünün müdafiəsi uğrunda gedən döyüşlərdə nazirliyin onlarca əməkdaşının igidliklə vuruşduğu, onlardan 6 nəfərinin Azərbaycanın Milli Qəhrəmanı adına layiq görüldüyü qeyd edilmişdir.

Son vaxtlar beynəlxalq terror təşkilatları ilə əlaqəsi sübuta yetirilmiş 2 cinayətkar dəstənin vaxtında zərərsizləşdirilməsi, 12 terror-təxribat cəhdinin qarşısının alınması beynəlxalq təşkilatlar tərəfindən razılıqla qarşılanmışdır.

Görüşdə çıxış edən istefada olan general-mayor Bahadur Hüseynov, Milli Məclisin deputatı Şaitdin Əliyev, MTN Akademiyasının müdavimləri, ziyalılar, ictimaiyyətin nümayəndələri nazirlik əməkdaşlarının hər birinin MTN-nin 86 illiyini alnıaçıq, üzüağ qarşılamağa, əldə edilmiş uğurlarla öyünməyə tam haqqı olduğunu bildirmiş, onları peşə bayramları münasibətilə təbrik edərək, şərəfli işlərində uğurlar arzulamışlar. Təqdirəlayiq hal kimi vurğulanmışdır ki, son vaxtlar MTN öz fəaliyyətində aşkarlığa, xalqla ünsiyyətə xüsusi önəm verir. MTN-nin təkcə mart ayında 18 məlumatla çıxış etməsi bunun əyani göstəricisidir. Nazirliyin strukturunda, kadrlarla işdə, maddi-texniki bazanın möhkəmlənməsində, yeni, müasir tələblərə cavab verən rabitə, informasiya texnologiyaları ilə təminat sahəsində görülən tədbirlərin əhəmiyyəti qeyd edilmişdir.

İctimaiyyətin nümayəndələri razılıq hissilə bildirmişlər ki, Azərbaycan Prezidenti İlham Əliyevin Sərəncamı ilə nazirliyin rəhbərliyində aparılmış kadr dəyişikliyi özünü tam doğrultmuş, qısa müddətdə artıq bu qurumda əsaslı keyfiyyət dəyişikliyi baş vermişdir. Dövlətimizin siyasi rəhbərliyinin xalqın rifahı, firavanlığı, qanunçuluğun qorunub möhkəmlənməsi istiqamətində apardığı məqsədyönlü siyasətinin bəyənildiyi, dəstəkləndiyi xüsusi vurğulanmışdır.

Görüşün respublikamızda ilk təhlükəsizlik orqanlarından birinin yaradıldığı, səmərəli fəaliyyət göstərdiyi, özünəməxsus müsbət ənənələrə malik Əzizbəyov rayonunda - həm də zəngin, nəfis tərtibatlı "Heydər Əliyev lektoriyası"nda keçirilməsinin əhəmiyyəti qeyd olunmuş, rayon gənclərinin ideya-siyasi tərbiyəsində müsbət rolu olan lektoriyaya MTN əməkdaşları tərəfindən yeni kitablar hədiyyə edilmişdir.

"Respublika", 26 mart 2005-ci il