Hörmətli təhlükəsizlik orqanları əməkdaşları!

Əziz veteranlar!

Peşə bayramınız münasibətilə sizi səmimi-qəlbdən təbrik edir, hamınıza ən xoş arzularımı çatdırıram.

86 il öncə yaradılmış Azərbaycan təhlükəsizlik orqanları ziddiyyətli və mürəkkəb, eyni zamanda şərəfli inkişaf yolu keçərək, kiçik bölmədən müstəqil respublikamızın əsas dayaqlarından və dövlətçilik institutlarından birinə - milli maraqların təhlükəsizliyini təmin edən nüfuzlu güc strukturuna çevrilmişdir.

Ötən əsrin ortalarından başlayaraq, təhlükəsizlik orqanlarında vətənə, dövlətə və xalqa əsil sədaqət ideyalarını formalaşdıran Heydər Əliyev ənənələri bu gün də sizin tərəfinizdən yaşadılır, böyük əzm və uğurla davam etdirilir. Əlamətdar haldır ki, Ümummilli Liderimiz ilk əmək fəaliyyətinə təhlükəsizlik orqanında başlamış, bu təşkilatda çalışdığı, sonradan respublikaya rəhbərlik etdiyi dövrlərdə azərbaycançılıq ideyalarının fədakar təbliğatçısı, bütün sahələrdə, o cümlədən xüsusi xidmət orqanlarında milliləşdirmə prosesinin banisi olmuşdur. Bu peşə bayramınız da Prezident Heydər Əliyevin sərəncamı ilə təsis edilmişdir.

Azərbaycan təhlükəsizlik orqanlarının şəxsi heyəti tərəfindən dövlətçiliyin möhkəmləndirilməsində, siyasi, iqtisadi, sosial, elm, mədəniyyət və digər həyat əhəmiyyətli sahələrdə milli maraqların etibarlı qorunmasında nümunəvi xidmətlər göstərilir.

Beynəlxalq aləmdə, regionda və cəmiyyətdə ictimai-siyasi proseslərin sürətli inkişafı, bölgədə xarici dövlətlərin və bəzi dairələrin maraq və mənafelərinin toqquşduğu, qloballaşma dövrünün meydana çıxardığı yeni təhdidlərin mövcudluğu, xüsusən də işğalçı Ermənistan tərəfindən xalqımıza qarşı düşmənçilik, terrorçuluq siyasətinin davam etdirildiyi bir zamanda Azərbaycanın xüsusi xidmət orqanlarının üzərinə böyük məsuliyyət, mühüm problemlərin həlli istiqamətində təxirəsalınmaz tədbirlərin həyata keçirilməsi vəzifəsi düşür.

Bayram günü ərəfəsində Milli Təhlükəsizlik Nazirliyinin bir qrup əməkdaşının ali hərbi rütbələrə layiq görülməsi, orden və medallarla təltif olunması sizin xalqa və dövlətə sədaqətlə xidmətinizin bariz ifadəsidir. İnanıram ki, siz bundan sonra da Azərbaycan Respublikasının demokratik və hüquqi dövlət kimi tərəqqisi istiqamətində aparılan siyasi kursun uğurla həyata keçirilməsində bütün səylərinizi səfərbər edəcək, sabitliyin qorunub saxlanılması və ölkədə tam təhlükəsizlik şəraitinin yaradılması işinin fəal iştirakçısı olacaqsınız.

Sizi peşə bayramı münasibətilə bir daha təbrik edir, hamınıza uzun ömür, cansağlığı, səadət diləyir, sabitlik və inkişaf, yeniləşmə və müasirləşmə mərhələsində Azərbaycan dövlətinin daha da qüdrətlənməsi naminə şərəfli vəzifələrin yerinə yetirilməsində yeni-yeni uğurlar arzulayıram.

İlham ƏLİYEV,
Azərbaycan Respublikasının Prezidenti
Bakı şəhəri, 28 mart 2005-ci il