Transmilli mütəşəkkil cinayətkarlıqla mübarizədə qeyri-leqal miqrasiya və insan ticarəti ilə əlaqəli cinayətlərin aşkarlanması və qarşısının alınması mühüm yer tutur. Bu növ cinayətlərin qurbanlarının terrorçuların təsiri altına düşmələri və alətə çevrilmələri istisna deyil. Digər tərəfdən, asılılıq baxımından qeyri-leqal miqrantlardan insan alveri, qanunsuz silah-sursat ticarəti və narkobiznesdə istifadə olunması faktları da mövcuddur. Qeyri-leqal miqrasiya faktlarına dair milli təhlükəsizlik orqanları tərəfindən toplanılaraq prokurorluq və daxili işlər orqanlarına göndərilmiş materiallar əsasında son üç ildə 18 cinayət işi başlanılmışdır.

İnsan ticarəti ilə əlaqəli əməllər transmilli mütəşəkkil cinayətkarlığın xalqımızın genofondu və ictimai-mənəvi dəyərlərinə real təhlükə doğuran növüdür. Milli Təhlükəsizlik Nazirliyi tərəfindən son dövrlər aşkar olunmuş insan alveri faktları ilə bağlı 5 cinayət işi başlanılmışdır.

2007-ci ildə aparılmış əməliyyat tədbirləri nəticəsində qanunsuz miqrasiyanın və insan alverinin qarşısı alınması istiqamətində cəmi 4 (2-si qeyri-leqal miqrasiya və 2-si insan alveri) cinayət işi qaldırılmış və müvafiq materiallar aidiyyatı dövlət orqanlarına təqdim edilmişdir.
2008-ci ilin birinci yarısında qanunsuz miqrasiya faktı ilə bağıl materiallar müvafiq dövlət qurumuna göndərilmiş və bununla bağlı cinayət işi başlanmışdır.